समाचार

देशभर देखियो मनसुनको प्रभाव : भारी वर्षा हुने सम्भावना, कहाँ–कहाँ ?

काठमाडौं – देशभर मनसुनको न्यून चापीय रेखा औसत स्थानमा रहेकाले देशका अधिकांश स्थानमा भारी मनसुनी वर्षाको सम्भावना रहेको छ ।देशका अधिकांश स्थानमा आंशिकदेखि सामान्य बदली रही केही स्थानमा हल्कादेखि मध्यम वर्षा भइरहेको जल तथा मौसम विज्ञान विभाग मौसम पूर्वानुमान महाशाखाले जनाएको छ ।

महाशाखाले मंगलबार विशेष बुलेटिन जारी गर्दै मनसुनी प्रणालीको प्रभावका कारण तीन दिन देशको अधिकांश स्थानमा मेघ गर्जनसहित मध्यमदेखि भारी वर्षाको सम्भावना रहेकाले त्यसबाट बच्न आवश्यक सतर्कता अपाउन अनुरोध गरेको हो ।जुन १० देखि सेप्टेम्बर २६ सम्मको समयलाई मनसुनको अवधि मानिन्छ ।

काठमाडौं उपत्यकामा यस वर्ष मनसुन शुरू भएपछि सबैभन्दा धेरै वर्षा जुलाई १३ अर्थात् असार २८ मा १०४ मिलिलिटर भएको थियो । यो मनसुन शुरू भएपछिको सबैभन्दा बढी वर्षा हो । ५० देखि १०० मिलिमिटरसम्मको वर्षालाई भारी र १०० देखि माथिलाई अतिभारी वर्षा भनेर मापन गर्नै गरेको मौसमविद्को भनाइ रहेको छ ।

महाशाखाले आगामी २४ घण्टाका लागि चेतावनी जारी गर्दै देशको पूर्वी तथा मध्यपहाडी भूभागका एक–दुई स्थानमा भारी वर्षाको सम्भावना रहेको बताएको छ । चुरेबाट बहने नदीमा पानीको बहावमा आकस्मिक वृद्धि हुनसक्ने भएकाले नदी आसपासको बस्तीलाई सतर्क रहन तथा सडक यातायातमा पहिरो भूक्षयका कारण अवरोध आउन सक्ने भएकाले सो क्षेत्रमा यात्रा गर्दा सामान्य सतर्कता अपनाउनसमेत अनुरोध गरिएको छ ।

राति देशभर सामान्यतया बदली रही मध्य र पश्चिमी क्षेत्रका केही स्थान तथा पूर्वको एक–दुई स्थानमा मेघ गर्जन र चट्याङ्गसहित हल्कादेखि मध्यम वर्षाको सम्भावना रहेको बताइएको छ । भोलि देशका धेरै स्थानमा सामान्यतया बदली रही केही स्थानमा मेघ गर्जन र चट्याङ्गसहित हल्कादेखि मध्यम वर्षाको सम्भावना रही देशको पहाडी भूभागको एकरदुई स्थानमा भारी वर्षाको सम्भावना रहेको मौसम पूर्वानुमान महाशाखाले जनाएको छ ।

बिहीबार देशभर आंशिकदेखि सामान्य बदली रही देशको पूर्वी तथा मध्य पहाडी भूभागका एक–दुई स्थानमा भारी वर्षाको सम्भावना रहेको जल तथा मौसम पूर्वानुमान महाशाखाबाट जनाइएको छ ।

Related Articles

Back to top button
Close